Birthday

yahī vo din the jab ik dūsre ko paayā thā
hamārī sāl-girah Thiik ab ke maah meñ hai

ishrat-e-hāl-e-nau mubārak ho
aap ko sāl-e-nau mubārak ho

kyā isī bhuul ko kahte haiñ mohabbat kā zavāl
ab mujhe yaad nahīñ sālgirah bhī terī

bār-e-ḳhātir hī agar hai to ināyat kiije
aap ko husn mubārak ho mirā dil mujh ko

hasīn chehre kī tābindagī mubārak ho
tujhe ye sāl-girah kī ḳhushī mubārak ho

aaj yāroñ ko mubārak ho ki sub.h-e-eid hai
raag hai mai hai chaman hai dilrubā hai diid hai

sair-e-gulzār mubārak ho sabā ko ham to
ek parvāz na kī thī ki giraftār hue

ye to ik rasm-e-jahāñ hai jo adā hotī hai
varna sūraj kī kahāñ sālgirah hotī hai

baañT Daale aise ham ne dil ke TukḌe kaaT kar
janm din pe bāñTte haiñ cake jaise kaaT kar

ek pattā shajar-e-umr se lo aur girā
log kahte haiñ mubārak ho nayā saal tumheñ

ye be-ḳhudī ye laboñ kī hañsī mubārak ho
tumheñ ye sālgirah kī ḳhushī mubārak ho

huzūr aap takalluf meñ kyoñ paḌe hue haiñ
mare huoñ ke janam-din nahīñ manātā koī

tū ḳhudā hai to bajā mujh ko Darātā kyuuñ hai
jā mubārak ho tujhe tere karam kā saaya

jab vasl kā aa.egā tire saath sanam din
us din ko haqīqat meñ kahūñgā maiñ janam-din

farishta hai to taqaddus tujhe mubārak ho
ham aadmī haiñ to aib-o-hunar bhī rakhte haiñ

ghirā huā huuñ janam-din se is ta.āqub meñ
zamīn aage hai aur āsmāñ mire pīchhe

maañ kī duā na baap kī shafqat kā saayā hai
aaj apne saath apnā janam din manāyā hai

mehñdī mire lahū kī mubārak ho aap ko
rañg-e-hinā hai is meñ aur bū-e-vafā bhī hai

'shu.ūr' aap kā pyaar aap ko mubārak ho
ye pyaar kā nahīñ P.R kā zamāna hai

sālgirah par kitnī nek tamannā.eñ mausūl huiiñ
lekin in meñ ek mubārakbād abhī tak baaqī hai