Shayari Of Taashshuq Lakhnavi

uThte jaate haiñ bazm-e-ālam se
aane vaale tumhārī mahfil ke

vo khaḌe kahte haiñ merī laash par
ham to sunte the ki niiñd aatī nahīñ

charāġh-e-dāġh maiñ din se jalā.e baiThā huuñ
sunā hai jo shab-e-furqat siyāh hotī hai

paḌ ga.ī kyā nigah-e-mast tire saaqī kī
laḌkhaḌāte hue mai-ḳhvār chale aate haiñ

bār-e-ḳhātir hī agar hai to ināyat kiije
aap ko husn mubārak ho mirā dil mujh ko

tamām umr kamī kī kabhī na paanī ne
ajab karīm kī rahmat hai dīda-e-tar par

jalūñgā maiñ ki dil us but kā ġhair par aayā
uḌegī aag ki patthar girā hai patthar par

gayā shabāb par itnā rahā ta.alluq-e-ishq
dil o jigar meñ tapak gaah gaah hotī hai

aamad aamad hai ḳhizāñ kī jaane vaalī hai bahār
rote haiñ gulzār ke dar bāġhbāñ khole hue

mujh se lākhoñ ḳhaak ke putle banā saktā hai tū
maiñ kahāñ se ek terā sā ḳhudā paidā karūñ

qāfile raat ko aate the udhar jaan ke aag
dasht-e-ġhurbat meñ jidhar ai dil-e-sozāñ ham the

saaf dekhā hai ki ġhunchoñ ne lahū thūkā hai
mausam-e-gul meñ ilāhī koī dil-gīr na ho