kyaa shai hai khinch leti hai shab ko sar-e-falak — Tafzeel Ahmad

furaat-e-chashm pe hai karbalaa ki tughyaani
darun-e-kufa-e-dil iid karne aayaa huun

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

azaab-e-barq-o-baaraan thaa andheri raat thi
ravaan thiin kashtiyaan kis shaan se is jhiil mein

raaton ki niind ek pari-zaad le uDi
din kaa sukun fikr-e-maishat mein kho gayaa

kal raat main bahut hi alag saa lagaa mujhe
us ki nazar ne yuun miri surat khangaali dost