jis ki auqaat dekhni ho mujhe — Tanzila Afzal

main ne ye soch ki nimTaa liye apne jhagDe
aur uljheinge agar aa gae suljhaane log

jab jahaan chaahoge fursat se mileinge tum ko
log naayaab nahin hote hain Thukraae hue

makaan to khair bante rah gae hain
hamaare paas naqshe rah gae hain

vo kabhi dhoka nahin khaaegaa
bevafaa banda-shanaas aaj bhi hai

lab hain ehsaas-e-kamtari kaa shikaar
us ko darkaar hain miri aankhein

kis tarah ghair se main der kaa shikva karti
meri mahfil mein mire log nahin aae hue