Abdul Ahad Saaz

bura ho a.ine tira main kaun huun na khul saka
mujhi ko pesh kar diya gaya miri misal men

dost ahbab se lene na sahare jaana
dil jo ghabra.e samundar ke kinare jaana

dad-o-tahsin ki boli nahin tafhim ka naqd
shart kuchh to mire bikne ki munasib Thahre

khayal kya hai jo alfaz tak na pahunche 'saz'
jab aankh se hi na Tapka to phir lahu kya hai

ghar vaale mujhe ghar par dekh ke khush hain aur vo kya janen
main ne apna ghar apne maskan se alag kar rakkha hai

tum apne Thor-Thikanon ko yaad rakkho 'saz'
hamara kya hai ki ham to kahin bhi rahte hain

bol the divaanon ke jin se hosh vaalon ne
soch ke dhundlakon mein apnaa raasta paayaa

laa se laa kaa safar thaa to phir kis liye
har kham-e-raah se jaan ulajhti rahi

nazar to aate hain kamron mein chalte-phirte magar
ye ghar ke log na jaane kahaan gae hue hain

shaaeri talab apni shaaeri ataa us ki
hausle se kam maangaa zarf se sivaa paayaa

muflisi bhuuk ko shahvat se milaa deti hai
gandumi lams mein hai zaaiqa-e-naan-e-javin

pas-manzar mein 'fēd' hue jaate hain insaani kirdaar
focus mein rafta rafta shaitaan ubhartaa aataa hai