Shayari Of Akbar Allahabadi

"mesmerism ke 'amal meñ dahr ab mashġhūl hai maġhrib-o-mashriq meñ ik ‘āmil hai ik mā’mūl hai jism-o-jāñ kaise ki ‘aqloñ meñ taġhayyur ho chalā thā jo makrūh ab pasandīda hai aur maqbūl hai matla'-e-anvār-e-mashriq se hai ḳhilqat be-ḳhabar mustanad partav vo hai maġhrib se jo manqūl hai gulshan-e-millat meñ pāmālī sar-afrāzī hai ab jo ḳhizāñ-dīda hai barg apnī nazar meñ phuul hai koī markaz hī nahīñ paidā ho phir kyūñkar muhīt jhol hai pechīdgī hai abtarī hai bhuul hai"

"ḳhuub ik nāseh-e-mushfiq ne ye irshād kiyā bazm meñ us ne ta'allī jo kal akbar kī sunī na tirī fauj na shāgird na pairau na murīd na tū arjun hai na suqrāt rishī hai na munī kis nagīñ par haiñ tire naqsh ke āsār ‘ayāñ note-bōk terī shikasta tirī pencil hai ghunī fikr se zikr se 'ibrat se tujhe kaam nahīñ vāh-vā ke liye lafzoñ kī dukāñ tū ne chunī tab' meñ terī vahī ḳhāmī-e-hirs-e-duniyā ātish-e-ḳhauf-e-ḳhudā se na jalī hai na bhunī ḳhud-parastī hai bahut ḳhalq kī ḳhidmat kam hai dil-dahī kam hai to hai dil-shikanī chaar gunī"

"jalva-e-sāqī-o-mai jaan liye lete haiñ shaiḳh jī zabt kareñ ham to piye lete haiñ dil meñ yaad un kī jo aate hue sharmātī hai dard uThtā hai ki ham aaḌ kiye lete haiñ daur-e-tahzīb meñ pariyoñ kā huā duur naqāb ham bhī ab chāk-e-garebāñ ko siye lete haiñ ḳhud-kushī man' ḳhushī gum ye qayāmat hai magar jiinā hī kitnā hai ab ḳhair jiye lete haiñ muddat-e-vasl ko parvāne se pūchheñ ushshāq vo maza kyā hai jo be-jān-diye lete haiñ"

"misl-e-bulbul zamzamoñ kā ḳhud yahāñ ik rang hai arġhanūñ is anjuman meñ ḳhārij-az-āhang hai har ḳhayāl apnā hai yaañ ik mutrib-e-shīrīñ-navā har nafas siine meñ ik mauj-e-sadā-e-chang hai har tasavvur hai mirā 'aks-e-jamāl-e-rū-e-dost merā har majmū’a-e-vahm ik gul-e-ḳhush-rang hai lauh-e-dil har jumbish-e-mizhgāñ se hai mā'nī-pazīr har rag-e-andesha naqsh-e-ḳhāma-e-arzhang hai 'aks terā paḌ ke is meñ ho gayā pākīza-tar ai but-e-kāfir mirī āñkhoñ meñ faiz-e-gang hai nazm-e-'akbar' se balāġhat siikh leñ arbāb-e-‘ishq istilāhāt-e-junūñ meñ be-bahā farhang hai"

"hai do-roza qayām-e-sarā-e-fanā na bahut kī ḳhushī hai na kam kā gila ye kahāñ kā fasāna-e-sūd-o-ziyāñ jo gayā vo gayā jo milā vo milā na bahār jamī na ḳhizāñ hī rahī kisī ahl-e-nazar ne ye ḳhuub kahī ye karishma-e-shān-e-zahūr haiñ sab kabhī ḳhaak uḌī kabhī phuul khilā nahīñ rakhtā maiñ ḳhvāhish-e-‘aish-o-tarab yahī sāqī-e-dahr se bas hai talab mujhe tā’at-e-haq kā chakhā de maza na kabāb khilā na sharāb pilā hai fuzūl ye qissa-e-zaid-o-bakar har ik apne 'amal kā chakhegā samar kaho zehn se fursat-e-‘umr hai kam jo dilā to ḳhudā hī kī yaad dilā"

"rahā kartā hai murġh-e-fahm shākī na.ī tahzīb ke anDe haiñ ḳhākī chhurī se un kī kaTvā kar falak ne ḳhudā jaane hamārī naak kyā kī abhī engine gayā hai is taraf se kahe detī hai tārīkī havā kī rahī raat asia ġhaflat meñ sotī nazar europe kī kaam apnā kiyā kī"

"jalā.e jab sho'la-e-tahayyur to zehn DhūñDhe panāh kis kī ye kis ke mā'nī hue haiñ sābit ye sūrateñ haiñ gavāh kis kī ye chashm-e-lailā kahāñ se aa.ī ye qalb-e-mahzūñ kahāñ se ubhrā jo bā-ḳhabar haiñ unheñ ḳhabar hai nigāh kis kī hai aah kis kī jamāl-e-fitrat ke laakh partav qubūl-e-partav kī laakh shakleñ tarīq-e-'irfāñ maiñ kyā batā.ūñ ye raah kis kī vo raah kis kī ye kis ke 'ishvoñ kā sāmnā hai ki lazzat-e-hosh ho ga.ī gum ḳhudī se kuchh ho chalā huuñ ġhāfil paḌī hai mujh par nigāh kis kī"

"misoñ ke sāmne kyā maz.habī bahāna chale chaleñge ham bhī usī ruḳh jidhar zamāna chale ḳhudā ke vāste saaqī yahī nigāh-e-karam chalā hai daur to phir kyoñ ruke chalā na chale khilā hai bāġh-e-qanā’at meñ ġhuncha-e-ḳhātir ḳhudā bachā.e kahīñ hirs kī havā na chale faroġh 'ishq kā be-āh ke nahīñ mumkin na phaile bū-e-gulistāñ agar havā na chale khule kivāḌ jo kamre ke phir kisī ko kyā ye hukm bhī to huā hai ki rāsta na chale umīd-e-hūr meñ muslim to ho gayā huuñ magar ḳhudā hī hai ki jo mujh se ye panjgāna chale ḳhudī kī his se bhī hotā hai intishār 'akbar' kahāñ rahūñ ki mujhe bhī mirā pata na chale"

mohabbat kā tum se asar kyā kahūñ
nazar mil ga.ī dil dhaḌakne lagā

ta.alluq āshiq o māshūq kā to lutf rakhtā thā
maze ab vo kahāñ baaqī rahe biivī miyāñ ho kar

is qadar thā khaTmaloñ kā chārpā.ī meñ hujūm
vasl kā dil se mire armān ruḳhsat ho gayā

ilāhī kaisī kaisī sūrateñ tū ne banā.ī haiñ
ki har sūrat kaleje se lagā lene ke qābil hai