Akhtar Saeed Khan

tu kahani hi ke parde men bhali lagti hai
zindagi teri haqiqat nahin dekhi jaati

dushman-e-jan hi sahi saath to ik umr ka hai
dil se ab dard ki rukhsat nahin dekhi jaati

main safar men huun magar samt-e-safar koi nahin
kya main khud apna hi naqsh-e-kaf-e-pa huun kya huun

ye be-sabab nahin aa.e hain aankh men aansu
khushi ka lamha koi yaad aa gaya hoga

har mauj gale lag ke ye kahti hai Thahar jaao
dariya ka ishara hai ki ham paar utar jaa.en

zindagi kya hue vo apne zamane vaale
yaad aate hain bahut dil ko dukhane vaale

band rakkhoge dariche dil ke yaaro kab talak
koi dastak de rahaa hai uTh ke dekho to sahi

kis ko fursat thi ki 'akhtar' dekhtaa meri taraf
main jahaan jis bazm mein jab tak rahaa tanhaa rahaa

charaagh le ke use DhunDne chalaa huun main
jo aaftaab ki maanind ik ujaalaa hai

kaun jiine ke liye martaa rahe
lo sambhaalo apni duniyaa ham chale

bahut qarib rahi hai ye zindagi ham se
bahut aziiz sahi e'tibaar kuchh bhi nahin

tu kahaani hi ke parde mein bhali lagti hai
zindagi teri haqiqat nahin dekhi jaati