Shayari Of Haseebul Hasan

maiñ ka.ī kaam to dānista ġhalat kartā thā
taaki vo nuqs nikāle ki nahīñ aise kar

pāgal kiyā hai ishq ne aadhā jo rah gayā
ab aadhe sar ke dard kā puurā marīz huuñ

us ke me.aar par ḳhudā laa.e
us nazar tak to aa ga.e haiñ ham

hamārī ḳhair hai lekin bas ik guzārish hai
hamāre baad kisī se bhī yuuñ nahīñ karnā

tujhe pata thā maiñ tere baġhair kuchh bhī nahīñ
zarā taras bhī na aaya tujhe bichhaḌte hue

tere ḳhvāboñ ke pīchhe bhāgī thiiñ
merī āñkhoñ meñ paḌ ga.e chhāle

tumhārī āñkhoñ pe nazm kahne se pahle ham ne bhigoī āñkheñ
sunā huā thā zamīn nam ho to achchhī hotī hai kāsht-kārī

hamāre aañsū kisī Thikāne to lag rahe haiñ
furāt ke bad-nasīb paanī kā kyā banegā

"dil kī mahfil meñ kabhī ram nahīñ rakhte ham log ya.anī laḌte hue sar ḳham nahīñ rakhte ham log tum batā do tumheñ kis vaqt jagānā hogā dil dhaḌaktā hai alaram nahīñ rakhte ham log vahshat-e-abr banā detī hai thal ko dariyā raag gaate haiñ to phir sam nahīñ rakhte ham log surḳh joḌe kī qasam sabz muqaddar vaalī ab kisī rang kā parcham nahīñ rakhte ham log ab to har aañkh ke apne hī siyah halqe haiñ ab tire naam pe mātam nahīñ rakhte ham log"

"tū bhairvīñ meñ ye misrā zarā sunā ham ko kahīñ se lagtā nahīñ thā vo bevafā ham ko tumhāre kuchh bhī nahīñ the magar tumhāre saath kisī ko dekhā to dil se burā lagā ham ko hisāb kar ke juārī use batā rahe haiñ ki tere ġham ne ḳhasārā nahīñ diyā ham ko ham us ke zulm pe ro.e nahīñ magar phir bhī dilāse detā rahā rāt-bhar ḳhudā ham ko"

"darūn-e-dil kisī kachche makān kā naqsha hai mere vāste saare jahān kā naqsha maiñ dāstān se devī nikāl laayā huuñ lo ab banāte raho dāstān kā naqsha hameñ lagā thā ki ham dil banā rahe haiñ tirā magar banā to kaTīlī chaTān kā naqsha ye aur baat ki tujh tak pahuñch nahīñ paa.e vagarna paas thā saare jahān kā naqsha"

shāhzādī kī marzī hai lekin
mujh se achchhā ġhulām koī nahīñ