us ke meaar par khudaa laae — Haseebul Hasan

use bataanaa parinde use bulaate hain
use bataanaa ki shaair udaas hai us kaa

tere khvaabon ke pichhe bhaagi thiin
meri aankhon mein paD gae chhaale

hamaari vahshat kisi puraane khanDar ke aaseb ki amaanat
hamaari ghazlein hamaari devi ki ek tirchhi nazar kaa sadqa

laakh miThe hon tire shahr ke chashme lekin
ham tire shahr ko khush-aab nahin kah sakte

qasam hai tere taghaaful ki tujh se pahle mujhe
nahin pata thaa ki ehsaas-e-kamtari kyaa hai

sitaare dekhne vaale hamein bataate hain
hamaare honT tumhaari jabin ko tarseinge

jab ki pahlu se yaar uThtaa hai
dard be-ikhtiyaar uThtaa hai

ghussa aataa hai pyaar aataa hai
ghair ke ghar se yaar aataa hai

urdu mein baat kijiye urdu mein boliye
haq hai zabaan kaa pyaar kaa ras is mein gholiye

tum chitaa in ki jalaao na karo dafn inhein
pyaar ke khat hain ye hindu yaa musalmaan nahin

tiraa visaal baDi chiiz hai magar ai dost
visaal ko miri duniyaa-e-aarzu na banaa

hamein dekho hamaare paas baiTho ham se kuchh sikho
hamin ne pyaar maangaa thaa hamin ne daagh paae hain