Shayari Of Jaleel Manikpuri

jhūTe vaade bhī nahīñ karte aap
koī jiine kā sahārā hī nahīñ

javāñ hote hī le uḌā husn tum ko
parī ho ga.e tum to insān ho kar

ulTī ik haath se naqāb un kī
ek se apne dil ko thaam liyā

āfrīñ tujh ko hasrat-e-dīdār
chashm-e-tar se zabāñ kā kaam liyā

yahāñ tak un ke va.ade jhuuT nikle
qasam ko bhī huī hājat qasam kī

is jahāñ se guzar ga.e lākhoñ
us galī se koī guzar na sakā

dil meñ aa.e the sair karne ko
rah paḌe vo samajh ke ghar apnā

nigāh-e-gul se bulbul yuuñ girī hai
gire jis tarah tinkā āshiyāñ se

vo zulf-e-mushk-bū bikhrī huī thī
khulī chorī nasīm-e-sub.h-dam kī

aañkh rahzan nahīñ to phir kyā hai
luuT letī hai qāfila dil kā

nigāh barq nahīñ chehra āftāb nahīñ
vo aadmī hai magar dekhne kī taab nahīñ

jab unheñ dekho pyaar aatā hai
aur be-iḳhtiyār aatā hai