Naseem Dehlvi

ab vo gali ja-e-khatar ho ga.i
haal se logon ko khabar ho ga.i

ai dil phir un se dosti ki
o khana-kharab phir vahi ki

ThanDi kabhi na hongi kya garmiyan tumhari
akhir 'nasim' ka dil kab tak jala.iyega

kahte hain jise husn vo hai shama-e-jahan-tab
kahte hain jise ishq vo parvana hai us ka

kufr-o-din ke qa.ede donon ada ho ja.enge
zab.h vo kafir kare munh se kahen takbir ham

maza matl.a ka de fikr-e-do-pahlu ho to aisi ho
rahen hisse barabar bait-e-abru ho to aisi ho

harfon ke mile joD baDhaa husn raqam kaa
har lafz ke paivand mein bakhiya hai qalam kaa

tasadduq hone vaale pis na jaaein
uThaae haath se daaman ko chaliye

allaah re taraddud-e-khaatir ki kasratein
tuuda banaa diyaa mujhe gard-e-malaal kaa

husn-e-barahnagi ke uThaate baDe maze
hotaa na ruuh ko jo libaas-e-badan hijaab

ek se do daagh do se chaar phir to saikDon
khilte khilte phuul siine par gulistaan ho gayaa

matlab hai miraa aariz-e-pur-nur kaa jalva
aashiq huun tiraa naam ko banda huun khudaa kaa