Parveen Umm

zahid sambhal ghurur khuda ko nahin pasand
farsh-e-zamin pe paanv dimagh asman par

gar aap pahle rishta-e-ulfat na toDte
mar miT ke ham bhi khair nibhate kisi tarah

kabhi na ja.ega ashiq se dekh-bhal ka rog
pilao laakh use bad-maza dava-e-firaq

abdida ho ke vo aapas men kahna alvida.a
us ki kam meri siva avaz bharra.i hui

diye ja.enge kab tak shaikh-sahib kufr ke fatve
rahengi un ke sanduqcha men diin ki kunjiyan kab tak

makhluq ko tumhari mohabbat men ai buto
iman ka khayal na islam ka lihaz

havaa mein jab uDaa parda to ik bijli si kaundi thi
khudaa jaane tumhaaraa partav-e-rukhsaar thaa kyaa thaa

kuchh to kami ho roz-e-jazaa ke azaab mein
ab se piyaa kareinge milaa kar gulaab mein

baal rukhsaaron se jab us ne haTaae to khulaa
do farangi sair ko nikle hain mulk-e-shaam se

agar lohe ke gumbad mein rakheinge aqrabaa un ko
vahin pahunchaaegaa aashiq kisi tadbir se kaaghaz

na aayaa kar ke vaada vasl kaa iqraar thaa kyaa thaa
kisi ke bas mein thaa majbur thaa laachaar thaa kyaa thaa

pi baada-e-ahmar to ye kahne lagaa gul-ru
main surkh huun tum surkh zamin surkh zamaan surkh