daaru-e-hosh-rubaa nargis-e-bimaar to ho — Akhtar Orenwi

"tum ko dekhaa hai abhi tak ye gumaan hotaa hai naqsh jo dil mein hai aankhon se nihaan hotaa hai shauq kaa aalam-e-eajaaz ayaan hotaa hai khinch ke aataa hai yahaan husn jahaan hotaa hai qissa-e-dard khamoshi se ayaan hotaa hai taur-e-izhaar nazar tarz-e-bayaan hotaa hai raat khaamosh hai aise mein sitaaro sun lo dil-e-muztar miraa maail-ba-fughaan hotaa hai meri naakaam mohabbat ne baDaa kaam kiyaa muddaaa aalam-e-hasrat mein javaan hotaa hai khirman-e-zist mein shoale na bhaDak uThe hon daaman-e-dil ke qarib aaj dhuaan hotaa hai zikr khud chheD ke royaa kiyaa pahron 'akhtar' naam aate hi tiraa ashk ravaan hotaa hai"

"daar pe chaDh ke jo tajdid-e-vafaa hoti hai is shahaadat pe to sau jaan fidaa hoti hai jin ko daava-e-khirad ho zaraa aa kar dekhein ishq ki raah bahut hosh-rubaa hoti hai dard mein Duubi nigaahon ki zabaan hai goyaa aur baaton se go ye baat judaa hoti hai husn jab soz-e-mohabbat se jilaa paataa hai kyaa tajalli pas-e-faanus-e-vafaa hoti hai un hasin aankhon mein hai hasrat altaaf-o-karam dil hi jaane ye qayaamat ki adaa hoti hai phuul ke dida-e-pur-nam kaa ye anjaam ba-khair pattiyaan jhaDti hain shabnam bhi khafaa hoti hai subh tak haal-e-dil-e-zaar pe ro lo 'akhtar' is ghaDi dard ke maaron ki davaa hoti hai"

"na tajalliyaan na tasalliyaan na salaam hai na kalaam hai tiri jalva-gaah-e-khayaal mein bhi sukut hi kaa payaam hai abhi husn mahv-e-khiraam hai abhi shokh jalva-e-aam hai kabhi khalvaton mein bhi raam hai ki takhayyulaat kaa daam hai na vo aarzuein zabaan zabaan na vo hasratein hain nazar nazar tiri anjuman na vo anjuman na vo shauq hi kaa maqaam hai na vo tur-e-naaz ki bijliyaan na kalim-e-ishq ki shokhiyaan na vo raunaqein na vo ishratein na vo subh hai na vo shaam hai jo sharaab-e-husn-o-jamaal mein bhi hain bul-havas ki milaavaTein dil-e-mai-parast hai khun-fishaan ki ye mai-kade kaa nizaam hai dam-e-kaaenaat fughaan-fughaan gham-e-mumkinaat hai jaan-sitaan ye tasavvuraat dhuaan-dhuaan ki 'adam vujud kaa naam hai hai nishaan-e-zakhm subu-subu yahaan saagharon mein lahu-lahu ye bukaa ye naala ye hichkiyaan ye fughaan-e-shisha-o-jaam hai miri aah raunaq-e-anjuman hai sadaa-e-dard sukhan-sukhan tiri pardagi kaa ye baankpan kahaan jalva hai kahaan baam hai hai talaash-e-husn makaan-makaan vahi justuju hai zamaan-zamaan ye fareb 'akhtar'-e-khush-gumaan dil-e-mubtalaa kaa hi kaam hai"

"maqaam-e-dil bahut unchaa banaa hai kamand-e-aql ab tak naa-rasaa hai farogh-e-ishq se betaab jalve harim-e-naaz mein mahshar bapaa hai mizaaj-e-husn mein ye dard-mandi ba-faiz-e-ishq kyaa se kyaa huaa hai khirad hai justuju-e-soz-e-aatish mohabbat aarzu-e-barmalaa hai navaazish un ki muhtaaj-e-mohabbat miri kam-maaegi kaa aasraa hai chaman ki nikhat-afshaani kaa baais ye mauj-e-gul hai yaa mauj-e-sabaa hai bhalaa kyuun ho tujhe meri zarurat ki tu saare zamaane kaa khudaa hai"

"yaad aai hai tiri sakht maqaam aayaa hai dil ke sahraa mein ye vaqt-e-sar-e-shaam aayaa hai ik nae rang mein aaj un kaa payaam aayaa hai aarzuon ke liye naam-ba-naam aayaa hai jaan-ba-lab shauq ke sajde bhi taDap uTThe hain un ke andaaz-e-taghaaful ko salaam aayaa hai mere gham-khaana ke andoh khamoshi kaa harif kaisi begaana mizaaji kaa kalaam aayaa hai hil rahi hai mire zindaan-e-junun ki divaar phir tasavvur mein tiraa jalva-e-baam aayaa hai anjuman-saaz hai ye raaz-e-mohabbat ai dost zikr jab aayaa tiraa bar-sar-e-aam aayaa hai dil-e-betaab ki hasrat ne bikhere sajde majlis-e-ghair mein bhi teraa jo naam aayaa hai chashm-e-saaqi mein jhalakti hai miri laghzish-e-shauq kaanpte haath se lab tak abhi jaam aayaa hai 'aql ko josh-e-junun daar-o-rasan tak laayaa 'aql vaalon ke kabhi hosh bhi kaam aayaa hai teri sarkaar mein 'akhtar' ki du'aaein giryaan dil kaa kashkol liye teraa ghulaam aayaa hai"

"faiz-e-takhil se pahunchaa main gulistaan ke qarib aa chalaa qaafila dil kaa dar-e-zindaan ke qarib jazb-e-dil le hi gayaa husn-e-gurezaan ke qarib kaisaa aalam hai mire dida-e-hairaan ke qarib duur hangaama-e-tahzib se talat-ba-kanaar jalva-e-mehr ki tanvir bayaabaan ke qarib dil mein ik hasrat-e-khaamosh kaa tufaan uThaa faasle baDhte gae manzil-e-jaanaan ke qarib kaun jaane kahaan le jaaegi vahshat meri ek sahraa bhi to hai shahr-e-nigaaraan ke qarib main ne ashjaar ke kunjon mein pukaaraa tum ko aa ke tum lauT gae parda-e-mizhgaan ke qarib har ghaDi shauq ko hai chashm-e-fusun-saaz ki yaad be-khudi le gai sahraa mein ghazaalaan ke qarib saahil-e-amn mein aaghosh-e-mohabbat be-kaif kaash kashti miri pahunche kabhi tufaan ke qarib"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"