karb-e-hijraan zi-bas hai kyaa kiije — Azeem Quraishi

"sahraa kaa koi phuul mo'attar to nahin thaa thaa ek chhalaavaa koi manzar to nahin thaa phir kyuun tiri tasvir Dhali ruuh mein meri afsun tiri aankhon kaa musavvar to nahin thaa ban kar miraa apnaa vo banaa hasrat-e-jaaved thaa khaak kaa putlaa hi muqaddar to nahin thaa main bhi tiri khalvat kaa koi naaz churaataa aisaa koi qismat kaa sikandar to nahin thaa afsaana tiri zulf kaa ai jaan-e-tamannaa main kaise sunaataa mujhe azbar to nahin thaa talkhaaba-e-dil thaa ki havaadis kaa sharar thaa fariyaad na kartaa koi patthar to nahin thaa khud aag mein apni hi main jaltaa rahaa aksar bargashta main tujh se mire daavar to nahin thaa ham ne bhi 'azim' aaj ghazal teri suni hai uslub-e-bayaan teraa muassar to nahin thaa"

"ye phuul jo miTTi ke hayulon se aTaa hai maazi kaa koi khvaab hai maanus sadaa hai sukhaa huaa pattaa huun ki be-Daal paDaa huun kyaa jaaniye kis ke liye ye jog liyaa hai ai khaar-e-chaman-zaar munajjim to nahin tu fardaa kaa har ik raaz tire lab se sunaa hai puchho ye sitaaron se ki tauzih karein vo kyuun laash pe yuun chaand ki maatam saa bapaa hai dukhte hue dil se kai shahkaar nikaale is daur ko ham ne hi ziyaa-paash kiyaa hai jam bhi vahi daaraa bhi sikandar bhi vahi hai ji kar bhi tiraa aur jo mar kar bhi tiraa hai tu mujh se gurezaan hai to main tujh pe huun qurbaan ishva hai jo vo teraa to ye meri adaa hai fankaar ne samjhaa na mughanni hi ne samjhaa jo sirr-e-nihaan ek qalandar ne kahaa hai main phir bhi 'azim' us ki adaaon pe miTaa huun jo marg kaa unvaan miri hasti ki baqaa hai"

"ram-e-jaavedaana ghazal hi to hai surud-e-shabaana ghazal hi to hai numaayaan kiyaa jis ne is daur ko vo hur-e-yagaana ghazal hi to hai nihaan jis mein sadiyon ki tashkil hai vo zarrin taraana ghazal hi to hai adab kaa agar irtiqaa hai to ye urus-e-zamaana ghazal hi to hai ye sirr-e-hasin sab ko batlaa 'azim' yam-e-be-karaana ghazal hi to hai"

"biich dilon mein utraa to hai dard tiraa albelaa to hai ruup tiraa ai raaj-kumaari jaise meri rachnaa to hai chaand ko tum aavaaz to de lo ek musaafir tanhaa to hai srijan-haaraa srijan-haaraa tujh bin baalak bilkaa to hai sirr-e-aalam kuchh kuchh ham ne sochaa to hai jaanaa to hai kitni subhein barham hongi shoala imshab bhaDkaa to hai kahne vaale kahtaa jaa tu sunne vaalaa suntaa to hai muzd kabhi barbaad na hogi nazd-o-dur ye charchaa to hai marg ko yuun be-naam na samjho ek takhayyul ujlaa to hai subh-e-ishq akeli kab hai shaam-e-gham kaa pahraa to hai maggham maggham pinhaan pinhaan baat kaa afsun gahraa to hai khvaab sahi gar naqsh-e-aalam insaan aataa jaataa to hai khoj mein us ki barson phir ke chaand-nagar pahchaanaa to hai raste baste baagh mein yaaro marg kaa har-dam khaTkaa to hai teraa 'azim' ai jaan-e-aalam 'mir' ki lai mein gaataa to hai"

"rang kahaan hai saayaa saa hai naqsh kahaan hai dhokaa saa hai subh ki rangat zardi-maail shaam nahin hai dhaDkaa saa hai dil kaa khuun huaa ho shaayad duur pare jo kohraa saa hai sail-e-ishq thamaa kab hogaa dariyaa hai aur chaDhtaa saa hai lab us ke jo khulte dekhe ek jahaan kuchh hanstaa saa hai asl mein naqsh-e-kaif-e-hasti faani saa hai miTtaa saa hai husn aur ishq hain donon kaafir donon mein ik jhagDaa saa hai aao pyaar se dho lein us ko naqsh-e-jahaan kuchh mailaa saa hai"

"vo shokh dil-o-jaan ki tamannaa to na niklaa sho'la to na niklaa vo sharaaraa to na niklaa mahsus kiyaa dard ke har ruup mein us ko aavaaz kaa afsun kabhi jhuTaa to na niklaa mahrumi-e-jaaved ne donon hi ko maaraa ye raaz-e-mohabbat koi gahraa to na niklaa ye dil kaa kharaaba hi tiri raahguzar thi kaa'ba to na niklaa vo kalisaa to na niklaa vo mere muqaddar ki siyaahi thaa saraapaa nur-e-shab-e-mahtaab sunahraa to na niklaa ham bhi kisi shirin ke liye khaana-badar the farhaad rah-e-'ishq mein tanhaa to na niklaa is mein tiri khalvat kaa har ik rang hai paayaa ye chaand sar-e-charkh akelaa to na niklaa pahle se baDhi aur gham-e-'ishq ki talkhi tu bhi mire dam-saaz masihaa to na niklaa andaaz-e-bayaan teraa 'azim' aur hi kuchh hai dekhe sabhi fankaar pa tujh saa to na niklaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"kyaa apne shahr mein koi aisaa makaan hai samjhun jise ki asl mein vo ik jahaan hai DhunDo haqiqat is mein na afsaana hi koi is kaa bayaan kuchh nahin us kaa bayaan hai apnaa shi'aar ab hai faqat amn-dushmani ye aur baat faakhta apnaa nishaan hai likhne ko ek harf na kahne ko ek lafz yuun to qalam hai haath mein munh mein zabaan hai vo lams jis ke baa'd zamaane guzar gae vo lams ab bhi taaza hai ab bhi javaan hai ho jaaegaa yaqin sabhon kaa hi kal jo aaj meraa yaqin aur sabhon kaa gumaan hai shatranj ki bisaat ki thi apni mez par shatranj ki bisaat ki saaraa jahaan hai"

"charaaghon se kuchh to churaayaa gayaa hai jo thi aag us ko bujhaayaa gayaa hai likhaa thaa jinhein sirf apne lahu se mire un khaton ko jalaayaa gayaa hai hazaaron daf'a us ne ki bevafaai mujhe bevafaa kyon bataayaa gayaa hai mujhe khud nikalnaa paDaa apne ghar se ye mat sochnaa ki bhagaayaa gayaa hai khabar ye mili hai ki mere hi ghar mein kisi ghair ko ab basaayaa gayaa hai mujhe hi sataa kar mujhe hi rulaa kar ye ilzaam mujh par lagaayaa gayaa hai tumhein kyaa bataaun mohabbat mein 'raavat' mujhe kis qadar aazmaayaa gayaa hai"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"