Ghazal

"rahtaa hai mere dil se vo aisaa lagaa huaa khaali makaan pe jaise ho taalaa lagaa huaa nuqsaan sau tarah ke uThaane paDe mujhe ye kaise kaarobaar mein dil thaa lagaa huaa aankhein jo mundiye to andheraa hai kis qadar baahar to raushni kaa hai mela lagaa huaa kahte hain log ab jise sahraa sukut kaa bahtaa thaa mere ghar se vo dariyaa lagaa huaa aayaa jo hosh saamne banjar zamin thi samjhe ye the hai baagh phalon kaa lagaa huaa rahzan ho raahbar ho ki dushman ho dost ho lagtaa hai sab ke chehre pe chehra lagaa huaa 'razzaaqi' ab na Taaliye fursat pe koi kaam taa-'umr ye rahegaa jhamelaa lagaa huaa"

"zakhmi to huaa vaqt ke patthar se bahut main TuuTaa nahin lekin kabhi andar se bahut main haalaat hi kuchh aise rahe apne hamesha bas duur talak jaa na sakaa ghar se bahut main bahrupi hai kyaa jaaniye kis rang mein aa jaae us shakhs se uljhaa nahin is Dar se bahut main kyaa raat bhi guzregi isi taur se yaa-rab halkaan pareshaan thaa din bhar se bahut main 'razzaaqi' koi muft bhi le jaae to de duun tang aayaa huun apne dil-e-muztar se bahut main"

"tu us ko bhuul jaa achchhaa rahegaa vagarna 'umr bhar rotaa rahegaa zamin ki pyaas bujh jaaegi lekin samundar taa-abad pyaasaa rahegaa tumhaaraa dard bhi ab kam na hogaa hamaaraa zakhm bhi taaza rahegaa ye musht-e-khaak sarmaaya hai meraa uDaa duun gar ise to kyaa rahegaa vo rasta ham banaate hain ki jis par zamaana der tak chaltaa rahegaa suno tufaan pichhe aa rahaa hai abhi kuchh der sannaaTaa rahegaa kasile ghunT main piitaa rahungaa magar shirin miraa lahja rahegaa"

"puchhte ho ki kyaa banaataa huun dard kaa aaina banaataa huun aadmi kaaTtaa huun kaaghaz ke aur phir qaafila banaataa huun aap insaan nahin farishte hain is liye faasla banaataa huun har ghaDi kuchh kami si lagti hai har ghaDi kuchh nayaa banaataa huun mujh ko khud hi pata nahin ab tak naqsh main dil pe kyaa banaataa huun tirgi phir bhi kam nahin hoti roz suraj nayaa banaataa huun"

"aakhir ko bhuul jaanaa hi behtar lagaa mujhe maazi ko jab bhi yaad kiyaa Dar lagaa mujhe baahar to raushni ke jhamaake se the bahut naqsha siyaah dasht kaa andar lagaa mujhe maaraa to thaa 'adu ne kisi aur ko magar shaayad ye meraa haq thaa ki patthar lagaa mujhe muddat se meri aankhon ko thaa jis kaa intizaar dekhaa jo ju-e-khun kaa shanaavar lagaa mujhe"

"jidhar bhi dekhiye sahraa dikhaai detaa hai 'ajab zamin kaa naqsha dikhaai detaa hai kahin pe khuun ke ashkon mein tar-ba-tar chehre kahin pe aag kaa dariyaa dikhaai detaa hai ye mere paanv mein zanjir Daal di kis ne miraa to qaafila jaataa dikhaai detaa hai miri nazar se ye duniyaa utar gai aakhir tiraa hi chaar-su jalva dikhaai detaa hai kisi pari ki tamanna agar nahin dil mein to sar mein kis kaa ye saudaa dikhaai detaa hai"

"sach hi bolo zabaan rahe na rahe haq hi likkho ki jaan rahe na rahe kal ye baarish ye dhuup ho ki na ho sar pe ye saaebaan rahe na rahe phir ye taab-e-nazar mile na mile phir ye manzar javaan rahe na rahe kyaa pata kab zamin karvaT le kyaa pata aasmaan rahe na rahe jaane kab se sulag rahaa huun main der tak bhi dhuaan rahe na rahe 'mir' o 'ghaalib' nahin main 'razzaaqi' kal miri daastaan rahe na rahe"

"hijr mein vasl-manzar banaate hue raat kaTti hai dilbar banaate hue jaane kyon ro paDe jaane kyon hans diye dil banaate hue sar banaate hue teraa chehra mujhe yaad aayaa bahut raat maah-e-munavvar banaate hue jaise uDne lagaa main khalaa-dar-khalaa teri tasvir mein par banaate hue jism se ruuh tak ik anokhi chamak yaad ko teri mehvar banaate hue canvas par larazne lagin ungliyaan ik mohabbat kaa manzar banaate hue baat rone ki thi aur hansne lagi apne dil ko vo patthar banaate hue barq chamki ki baadal barasne lage qatre qatre ko nashtar banaate hue ye sitam kam nahin tum ko kuchh gham nahin apni miTTi ko banjar banaate hue"

"is safar mein to ham-safar bhi nahin koi saaya nahin shajar bhi nahin tujh se rakhtaa hai ittifaaq ab kaun tere ahbaab teraa ghar bhi nahin us ko sardaar ham banaate hain jis ki gardan pe apnaa sar bhi nahin ek tu hi nahin hai saath mire varna tanhaa main is qadar bhi nahin kyaa tamaasha hai bhiiD itni baDi aur ik fard mo'tabar bhi nahin karnaa us se hazaar baat magar dekhnaa us ko ik nazar bhi nahin bujh gayaa yuun ‘niyaaz-razzaaqi dil mein sho'la to kyaa sharar bhi nahin"

"na jaane kyon hunar hote hue bhi nahin uDtaa main par hote hue bhi nazar haTti nahin chehre se us ke khudaa kaa dil mein Dar hote hue bhi use raas aa gai khaana-badoshi nahin lauTaa vo ghar hote hue bhi na jaane kab talak pyaasaa rahungaa samundar ham-safar hote hue bhi rahaa markaz mire vahm-o-gumaan kaa vo chehra mo'tabar hote hue bhi hamein ye dhuup achchhi lag rahi hai saron par tez-tar hote hue bhi"