Ghazal

"pher roz-e-firaaq-e-yaar aayaa naama-bar aah zaar zaar aayaa tere jaane se fitna ho tayyaar ba-sar-e-chashm ashk-baar aayaa jhaaDaa marqad pe mere jab daaman aasmaan kaa goyaa ghubaar aayaa mai se tauba to kar nahin saktaa kyaa karun mausam-e-bahaar aayaa maaraa jaavegaa bhaag ai naaseh dekh ye naaznin savaar aayaa kisi makhluq ko khudaa na dikhaae jo ki mujh par dar-intizaar aayaa is ki bedaad kaa khudaa de ajr haath mein le ke zul-fiqaar aayaa kahtaa hai sar jhukaa jo aashiq hai main to ab maail-e-shikaar aayaa 'aafridi' samajh hayaat-e-abad qatl ko tere gar vo yaar aayaa peshvaai ko is ki jaa jaldi kah ki haazir gunaahgaar aayaa tujhe 'qaasim-ali' khudaa ki qasam kaise zaalim pe e'tibaar aayaa"

"ji rahe yaa na rahe har qadam-e-yaar na chhoD ai patange tu kabhi shama kaa anvaar na chhoD shama tujh ko bhi munaasib tu vahaan tak jal jaa sar se taa paae tilak rishta-e-zunnaar na chhoD lab-e-shirin se agar ho na tiraa lab shirin kohkan tu bhi to ab daaman-e-kohsaar na chhoD liilaa haath aave na aave mile jo naaqa-savaar haal-e-gham se vo kare mana par izhaar na chhoD lafz tu ne jo kahe hain vo hi haq ai mansur kalimatul-haq ko magar taa-ba-dam-e-daar na chhoD ai zulekhaa mah-e-kanaan ko le de maal mataaa pesh baae ke koi mushtari zinhaar na chhoD is nasihat ko miri maan ba-qaul 'afridi' ji rahe yaa na rahe par qadam-e-yaar na chhoD"

"mohabbat maa-sivaa ki jis ne ki gori kaloTi ki yaqin kiijo ki kaafir ho ke apni raah khoTi ki mohabbat maa-sivaa allaah ki har kufr se bad-tar faqiron ne qanaaat tab to barsili langoTi ki qanaaat kaa khazina gar kisi ke haath lag jaave nahin parvaah rakhtaa hai kisi sarraaf soTi ki dil-e-qaane ke taiin naan-e-javin khush-tar ze-tar-halva nahin ho ehtiyaaj us ko pulaav gosht roTi ki jigar khaane mein apne faaeda az-bas, tu kyaa jaane vo jaane chaashni chakkhi ho jis ne dil ki boTi ki tan-e-laaghar ba-raah-e-ishq behtar hai bachaa laa ke kiyaa muzghe ne kyaa haasil agarche shakl moTi ki ab is duniyaa mein duniyaa chhoD kar rahnaa hi behtar hai kahaani thi baDi lek 'aafridi' ne to chhoTi ki"

"aashiq-e-sokhta-dil khatt-e-sanam donon ek jis tarah suniye judaa shaadi-o-gham donon ek donon baatin mein agar ek hain lekin koi aab-o-aatish nahin rakhtaa hai baham donon ek hai judaa sajde ki jaa hindu musalmaan ki magar fahm vaalon ke taiin dair-o-haram donon ek kuhl karte hain ham aankhon mein baraabar dono surma-e-kor ko aur khaak-e-qadam donon ek jab phansaa zulf mein jaa dil na rahaa nang-o-hayaa taaq par rakhiye vahaan nang-o-sharam donon ek baar-e-gham hijr paDaa sar pe kisi ke us dam khaak mein diije milaa aql-o-faham donon ek evaz-e-hijr na luun aish tamaam aalam kaa hai azal se mujhe farmaan-e-hakam donon ek dil mein armaan na rahaa baaqi jo chaahaa so kiyaa sair duniyaa ki bhi aur sair-e-adam donon ek yaar aaghosh mein apne hai muhayyaa har-dam bas hai ye mere taiin jaah-o-hasham donon ek aarzu 'qaasim-ali' dil mein nahin kuchh lekin chaahiye apne taiin fazl-o-karam donon ek"

"paanch din ko jo yahaan par aa gayaa misl-e-gul do roz mein kumhlaa gayaa zindagi phuslaa ke le aai mujhe kaun zaalim us jagah bahlaa gayaa kyuun chhuTaa kar ek adam ke aish ko dusraa koi adam dikhlaa gayaa hasti-e-mauhum par jo ghaur ki dosto be-tarah ji ghabraa gayaa peshtar marne se marnaa khuub hai jo ki ye samjhaao vahi kuchh paa gayaa aah is dil ne na maani ek baat naasehaa sau tarah se samjhaa gayaa ''ahl-e-duniyaa kaafiraan-e-mutlaq-and'' masnavi-e-rum ye farmaa gayaa zaq-zaq-o-baq-baq ko ab tu chhoD de tiflagi barnaa kaa sab jhagDaa gayaa sheb aayaa ab to 'afridi' samajh kyaa bharosa dam kaa hai aayaa gayaa kuchh khilaa le khaa le le jaanaa nahin jo gayaa hai yaan se so tanhaa gayaa kaun hai vo faqir-o-baadshaah jo kaf-e-afsos nahin maltaa gayaa hasrat-o-ranj-o-alam gham ke sivaa koi yaan se vaan ke taiin le kyaa gayaa 'aafridi' yaan sadaa rahnaa nahin jo gayaa hai vo yahi kahtaa gayaa"

"abr saan har-chand rakkhaa chashm ko pur-aab ham kar sake par kisht ulfat kaa nahin shaadaab ham hijr ki aatish ne aisaa qurb-e-dil paidaa kiyaa be-qaraaraana taDapte ab hain juun simaab ham chhaa gaiin zulfein kisi mukhDe pe juun aakaas puun khud-bakhud khaate hain pech-o-taab juun lailaab ham gard-baad-aasaa paDe phirte hain baagh-o-raagh mein maskan-o-maavaa kahaan rakhte hain dar-yak-baab ham dekh lene de tu apne kaan kaa bundaa hamein phir kahaan paaveinge zaalim ye dur-e-naayaab ham zindagi phuslaa ke laai yaan hazaar afsos aah phans gae be-tarah is duniyaa ke dar khullaab ham yaan hai fikr-e-maishat vaan hai andesha maaad hain ba-girdaab-e-gham-e-duniyaa-e-dun gharqaab ham munkashif hoti haqiqat marg gar roz-e-alast hargiz ai dahr az adam karte nahin peshaab ham mat kar 'afridi' ko is maslakh mein paaband aakhirash zabh ho jaaveinge tere haath ai qassaab ham"

"is arz ke takhte par sansaar hai aur main huun mauhum huaa to kyaa par yaar hai aur main huun paDti hai nazar jidhar vo yaar hai aur main huun hai kaun sivaa mere dildaar hai aur main huun main yaar kane qaasid bhejaa to hai par shaayad le naama agar aayaa ribaar hai aur main huun moDungaa nahin munh ko main ishq ke maidaan se is yaar ke abru ki talvaar hai aur main huun ab dekhiye kyaa nibTe siina hai sipar apnaa vo khanjar-e-mizhgaan kaa khun-khaar hai aur main huun jab se ba-sanam-khaana ki main ne qadam-bosi sau tarah ki zaahid se takraar hai aur main huun raahib ne mire qashqa sandal kaa lagaayaa hai naaqus hai ghanTa hai zunnaar hai aur main huun naf-o-zarar-e-duniyaa duniyaa hi pe main chhoDaa ab ishq kaa ai yaaro bevpaar hai aur main huun hairaan main huun ai yaaro kis vaaste 'afridi' rusvaai ba-har kucha baazaar hai aur main huun"

"ishq ki koi agar siikh le gar mujh se tamiz din-duniyaa mein huaa apne paraayon ko aziiz yaa ho shaagird miraa yaa mujhe talmiz kare varna is kucha-e-ushshaaq se kar jaave gurez maktab-e-ishq se naa-khvaanda uThaa jo mahrum dono aalam mein vo kuchh chiiz nahin hai naachiz mard kyunkar kahun be-ishq jo hove koi firqa ushshaaq mein us ke taiin kahte hain kaniz main ne ustaad-e-azal se yahi sikhaa thaa sabaq 'aafridi' na kabhi yaar ki chhoDun dahliz"

"jataa na mere taiin apnaa tu hunar vaaiz tu apne feal se munh apnaa khaak bhar vaaiz nasihat auron ko kartaa hai chaDh ke mimber par magar nahin hai tire dil pe kuchh asar vaaiz zabaan pe vaaz hai aur dil tiraa hai istighlaaz ba-vaaz-e-behuda mat baandh tu kamar vaaiz amal ba-vaaz kar apne ba-sidq-o-dil varna tu apne haal ko dekhegaa dar-hashar vaaiz baDhaa ke riish ko apni bhi juun dum-e-taaus ye kis khayaal pe bhulaa hai abla-khar vaaiz khudaa karim hai chaahegaa jis ko bakhshegaa kisi pe taan ki angusht tu na dhar vaaiz tu apne vaaz pe vaaiz na bhuul sach hi nahin ki raaz-e-ishq se tere taiin khabar vaaiz muqaabla ba-bahas mat kar ahl-e-rindaan se ki jis mein aap ke ho riish kaa zarar vaaiz kalaam-e-be-namak-o-be-asar se tu apne kharaab mat kare khilqat khudaa se Dar vaaiz yahaan vahaan pe tujhe gar najaat hai manzur kisi faqir ke qadmon par sar ko dhar vaaiz tu kahiyo pir-e-mughaan se salaam 'afridi' agar ba-ku-e-kharaabaat ho guzar vaaiz"

"jo meraa le gayaa dil kaun vo insaan hai kyaa hai pari hai yaa malak yaa huur yaa ghilmaan hai kyaa hai nazar zulfon pe us ki jaa paDi jis ki lagaa kahne ye donon saanp hain yaa kaakul-e-pechaan hai kyaa hai gayaa huun bhuul sab kuchh dukhtar-e-raz jaise haath aai jigar hai jaan hai imaan hai iqaan hai kyaa hai hamaare yaar ke kuchh darmiyaan jo baat bol uTThe raqib-e-ru-siyah ghammaaz yaa shaitaan hai kyaa hai zamin par jhaankte hain roz-o-shab aflaak se kis ko mah-o-khur yaa kisi kaa dida-e-hairaan hai kyaa hai mire rone ko dekhaa hijr mein jis ne so yuun bolaa jhaDi barsaat ki yaa mauja-e-tufaan hai kyaa hai ba-josh-e-ishq laTke hai nahin mujh ko tamiz itni ba-mizhgaan lakht-e-dil yaa dur hai yaa marjaan hai kyaa hai miri chhaati pe rakh kar dast ki tashkhis hukamaa ne ye siina kaan-e-gandhak yaa ki aatish-daan hai kyaa hai jale siine se duud uTThaa dimaagh aashufta kar Daalaa mukarrar dil bhunaa yaa phir jigar biryaan hai kyaa hai na bhuul ai khizr mar jaanaa hai aakhir Tuk jiyaa to kyaa agar maadaam hai kyaa hai vagar yak aan hai kyaa hai fanaa-fishshaikh ho, tafriq 'afridi' na kar hargiz nabi hai yaa ali yaa haafiz-e-quraan hai kyaa hai"