ai shama subh hoti hai roti hai kis liye — Aish Dehlvi

kalaam-e-mir samjhe aur zabaan-e-mirzaa samjhe
magar un kaa kahaa ye aap samjhein yaa khudaa samjhe

siine mein ik khaTak si hai aur bas
ham nahin jaante ki kyaa hai dil

be-sabaati chaman-e-dahr ki hai jin pe khuli
havas-e-rang na vo khvaahish-e-bu karte hain

main buraa hi sahi bhalaa na sahi
par tiri kaun si jafaa na sahi

aankhon mein meri subh-e-qayaamat gai jhamak
siine se us pari ke jo parda ulaT gayaa

maan bhi luun ki tiri yaad mahaz vaahima hai
phir bhi vo yaad hi dam-saaz rahi shaam-o-sahar

yahi bahut hai ki zinda hain qaid-e-zist mein ham
ye kaisi shaam hai kaisi sahar nahin maalum

aankhein sahar talak miri dar se lagi rahin
kyaa puchhte ho haal shab-e-intizaar kaa

halqa-e-shaam-o-sahar se nahin jaane vaalaa
dard is dida-e-tar se nahin jaane vaalaa

khat dekh kar miraa mire qaasid se yuun kahaa
kyaa gul nahin huaa vo charaagh-e-sahar hanuz