aaina sach boltaa hai aaina hai mo'tabar — Akhtar Asif

aaina to 'aibon ki khabar detaa hai 'aasif'
khush-fahmi-e-insaan kaa magar koi kare kyaa

nahin hai mujh ko chaman se nikaalnaa aasaan
ba-shakl-e-rang rag-e-gul mein bas gayaa huun main

jis shakhs ko saae ki hai aaj baDi chaahat
puchho to kabhi us ne paude bhi lagaae hain

main jiyun ehsaan biThaa kar vo bhi ik kam-zarf kaa
zindagi pyaari hai lekin is qadar pyaari nahin