main jiyun ehsaan biThaa kar vo bhi ik kam-zarf kaa — Akhtar Asif

aaina to 'aibon ki khabar detaa hai 'aasif'
khush-fahmi-e-insaan kaa magar koi kare kyaa

nahin hai mujh ko chaman se nikaalnaa aasaan
ba-shakl-e-rang rag-e-gul mein bas gayaa huun main

jis shakhs ko saae ki hai aaj baDi chaahat
puchho to kabhi us ne paude bhi lagaae hain

aaina sach boltaa hai aaina hai mo'tabar
sach ki 'aadat Daal tu bhi mo'tabar ho jaaegaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

uTThi hai jab se dil mein mire ishq ki tarang
shaadi o gham hain aage mire donon ek rang

yuun bhi milaa hai husn kaa andaaz ishq mein
bikhri hai un ki zulf pareshaan huaa huun main

jab bhi lauTaa gaanv ke baazaar se
mujh ko sab bachchon ne dekhaa pyaar se

ye khuddaar honaa hi laayaa kharaabi
mohabbat mein insaan khuddaar kyuun ho