aaina to 'aibon ki khabar detaa hai 'aasif' — Akhtar Asif

nahin hai mujh ko chaman se nikaalnaa aasaan
ba-shakl-e-rang rag-e-gul mein bas gayaa huun main

jis shakhs ko saae ki hai aaj baDi chaahat
puchho to kabhi us ne paude bhi lagaae hain

aaina sach boltaa hai aaina hai mo'tabar
sach ki 'aadat Daal tu bhi mo'tabar ho jaaegaa

main jiyun ehsaan biThaa kar vo bhi ik kam-zarf kaa
zindagi pyaari hai lekin is qadar pyaari nahin

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

sab ko qudrat thi khush-kalaami par
khaamushi mein zabaan-daraaz thaa main

ai chaman vaalo chaman mein yuun guzaaraa chaahiye
baaghbaan bhi khush rahe raazi rahe sayyaad bhi

aaj bahut din baa'd main apne kamre tak aa niklaa thaa
juun hi darvaaza kholaa hai us ki khushbu aai hai

khush-numaa lafzon ki rishvat de ke raazi kijiye
ruuh ki tauhin par aamaada rahtaa hai badan