jo alag ho gayaa thaa jhurmuT se — Anam Shahzadi

jaise dimak-zada koi lakDi
yuun tiraa hijr khaae jaataa hai

— Anam Shahzadi

mire dil mein december jam gayaa hai
pighal kar saal bhar bahtaa rahegaa

— Anam Shahzadi

kyaa musibat hai zindagi yaani
mujh ko jiinaa paDegaa marne tak

— Anam Shahzadi

main samajhti huun jise yaum-e-vilaadat apnaa
dar-haqiqat vo miri maut kaa pahlaa din thaa

— Anam Shahzadi

kuDe-daanon mein laash ki surat
main ne dekhe hain pyaar ke tohfe

— Anam Shahzadi

teri yaadon ki baandh kar gaThDi
main bahut duur pheink aai huun

— Anam Shahzadi

roza-daaraan-e-judaai kuun kham-e-abru-e-yaar
maah-e-id-e-ramazaan thaa mujhe maalum na thaa

— Siraj Aurangabadi

firaaq-e-khuld se gandum hai sina-chaak ab tak
ilaahi ho na vatan se koi gharib judaa

— Mohammad Rafi Sauda

is judaai mein tum andar se bikhar jaaoge
kisi maazur ko dekhoge to yaad aaungaa

— Wasi Shah

ik tire kahne se meraa kam nahin kirdaar hogaa
ye alag hai baat main teri kahaani mein nahin huun

— Raghvendra Dwivedi

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

— Muztar Khairabadi

is qadar musalsal thiin shiddatein judaai ki
aaj pahli baar us se main ne bevafaai ki

— Ahmad Faraz