jaise dimak-zada koi lakDi — Anam Shahzadi

mire dil mein december jam gayaa hai
pighal kar saal bhar bahtaa rahegaa

kyaa musibat hai zindagi yaani
mujh ko jiinaa paDegaa marne tak

main samajhti huun jise yaum-e-vilaadat apnaa
dar-haqiqat vo miri maut kaa pahlaa din thaa

kuDe-daanon mein laash ki surat
main ne dekhe hain pyaar ke tohfe

jo alag ho gayaa thaa jhurmuT se
us parinde ki khair ho maulaa

teri yaadon ki baandh kar gaThDi
main bahut duur pheink aai huun

hijr ki masaafat mein saath tu rahaa har dam
duur ho gae tujh se jab tire qarin pahunche

hijr thaa baar-e-amaanat ki tarah
so ye gham aakhiri hichki se uThaa

ham kahaan aur tum kahaan jaanaan
hain kai hijr darmiyaan jaanaan

hijr ki raat aur puuraa chaand
kis qadar hai ye ehtimaam ghalat

shab-e-hijr mein ek din dekhnaa
agar zindagi hai to mar jaaeinge

hijr mein bhi ham udaas utne na the
mil ke bichhDe to hue jitne udaas