jo kar rahe the zamaane se gumrahi kaa safar — Anwar Kaifi

ye to ho saktaa hai ki donon ki manzil ek ho
phir bhi us ke ham-safar hone ki farmaaish na kar

— Anwar Kaifi

gharib bhuuk ki Thokar se khuun khuun hue
kisi amiir ko ab to lahu ki baas aae

— Anwar Kaifi

ye daur mohabbat kaa lahu chaaT rahaa hai
insaan kaa insaan galaa kaaT rahaa hai

— Anwar Kaifi

dil se nikli hui har aah ki taasir mein aa
maang le rab se mujhe aur miri taqdir mein aa

— Anwar Kaifi

miri qismat ki kashti bahr-e-gham mein Duub sakti thi
tiri taqdir se shaayad miri taqdir ubhri hai

— Anwar Kaifi

rah-e-hayaat mein shaayad hi vo maqaam aae
ki naghma-haa-e-junun par sukut taari ho

— Anwar Kaifi

kam-umri mein sunet hain
mar jaate hain achchhe log

— Malikzada Javed

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

— Arshad Jamal Sarim

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

— Ahmad Faraz

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

apne man mein Duub kar paa jaa suraagh-e-zindagi
tu agar meraa nahin bantaa na ban apnaa to ban

— Allama Iqbal

baDe qalaq ki baat hai ki tum ise na paDh sake
hamaari zindagi to ik khuli hui kitaab thi

— Nazim Sultanpuri