kam-umri mein sunet hain — Malikzada Javed

jal gae phir se kuchh hasin rishte
tanziya guftugu ki bhaTTi mein

miyaan us shakhs se hoshiyaar rahnaa
sabhi se jhuk ke jo miltaa bahut hai

uThaao camera tasvir khinch lo in ki
udaas log kahaan roz muskuraate hain

zindagi ek kahaani ke sivaa kuchh bhi nahin
log kirdaar nibhaate hue mar jaate hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

ai shahr-e-sitam-zaad tiri umr baDi ho
kuchh aur bataa naql-e-makaani ke alaava

umr bhar tujh ko dekhne par bhi
zauq-e-nazzaara kam nahin hotaa

bahut aziiz thi ye zindagi magar ham log
kabhi kabhi to kisi aarzu mein mar bhi gae

har baar hi main jaan se jaane mein rah gayaa
main rasm-e-zindagi jo nibhaane mein rah gayaa