din din bhar aaina dekhaa jaataa hai — Aslam Rashid

aap kaa to shauq hai jalte gharon ko dekhnaa
aap aankhein nam kareinge aap rahne dijiye

qabr par phuul rakhne aayaa thaa
phir yahin ghar banaa liyaa main ne

sab ko kaanTon pe shak huaa thaa magar
zakhm ke aas-paas phuul mile

aansu bataa rahe hain ki mujh mein hai zindagi
yaa'ni main intizaar mein patthar nahin huaa

javaab hans ke diyaa us ne aur rone lagaa
savaal puchh ke sharmindagi baDhi meri

hansi un ke labon tak aa gai hai
mukammal ho gayaa ronaa hamaaraa