hansi un ke labon tak aa gai hai — Aslam Rashid

mujh se baahar nikal rahe the sab
main bhi hairaan saa nikal aayaa

din din bhar aaina dekhaa jaataa hai
tab jaa kar do chaar ishaare bante hain

aap kaa to shauq hai jalte gharon ko dekhnaa
aap aankhein nam kareinge aap rahne dijiye

qabr par phuul rakhne aayaa thaa
phir yahin ghar banaa liyaa main ne

sab ko kaanTon pe shak huaa thaa magar
zakhm ke aas-paas phuul mile

kuchh sazaa aur baDh gai is par
zakhm khaae to muskuraae kyon

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa