qabr par phuul rakhne aayaa thaa — Aslam Rashid

kuchh sazaa aur baDh gai is par
zakhm khaae to muskuraae kyon

mujh se baahar nikal rahe the sab
main bhi hairaan saa nikal aayaa

din din bhar aaina dekhaa jaataa hai
tab jaa kar do chaar ishaare bante hain

aap kaa to shauq hai jalte gharon ko dekhnaa
aap aankhein nam kareinge aap rahne dijiye

sab ko kaanTon pe shak huaa thaa magar
zakhm ke aas-paas phuul mile

hansi un ke labon tak aa gai hai
mukammal ho gayaa ronaa hamaaraa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

gali mein koi ghar achchhaa nahin thaa
magar kuchh khiDkiyaan achchhi lagi hain

kyunkar na tujhe dauD ke chhaati se lagaa luun
phulon kaa gale mein tire ye haar ghazab hai

hai mausam-e-bahaar kaa aaghaaz qahr hai
ab bhi agar chaman mein havaa mo'tadil na ho