mujh se baahar nikal rahe the sab — Aslam Rashid

kuchh sazaa aur baDh gai is par
zakhm khaae to muskuraae kyon

din din bhar aaina dekhaa jaataa hai
tab jaa kar do chaar ishaare bante hain

aap kaa to shauq hai jalte gharon ko dekhnaa
aap aankhein nam kareinge aap rahne dijiye

qabr par phuul rakhne aayaa thaa
phir yahin ghar banaa liyaa main ne

sab ko kaanTon pe shak huaa thaa magar
zakhm ke aas-paas phuul mile

hansi un ke labon tak aa gai hai
mukammal ho gayaa ronaa hamaaraa