charaagh us ne bujhaa bhi diyaa jalaa bhi diyaa — Bashiruddin Ahmad Dehlvi

miraa dil bhi tilismi hai khazaana
ki is mein khair bhi hai aur shar band

bandhan saa ik bandhaa thaa rag-o-pai se jism mein
marne ke baa'd haath se moti bikhar gae

zor se saans jo letaa huun to akasr shab-e-gham
dil ki aavaaz ajab dard bhari aati hai

kabhi dar par kabhi hai raste mein
nahin thakti hai intizaar se aankh

vo apne matlab ki kah rahe hain zabaan par go hai baat meri
hai chit bhi un ki hai paT bhi un ki hai jiit un ki hai maat meri

ye un kaa khel to dekho ki ek kaaghaz par
likhaa bhi naam miraa aur phir miTaa bhi diyaa