bandhan saa ik bandhaa thaa rag-o-pai se jism mein — Bashiruddin Ahmad Dehlvi

miraa dil bhi tilismi hai khazaana
ki is mein khair bhi hai aur shar band

charaagh us ne bujhaa bhi diyaa jalaa bhi diyaa
ye meri qabr pe manzar nayaa dikhaa bhi diyaa

zor se saans jo letaa huun to akasr shab-e-gham
dil ki aavaaz ajab dard bhari aati hai

kabhi dar par kabhi hai raste mein
nahin thakti hai intizaar se aankh

vo apne matlab ki kah rahe hain zabaan par go hai baat meri
hai chit bhi un ki hai paT bhi un ki hai jiit un ki hai maat meri

ye un kaa khel to dekho ki ek kaaghaz par
likhaa bhi naam miraa aur phir miTaa bhi diyaa

kisi ke ek ishaare mein kis ko kyaa na milaa
bashar ko ziist mili maut ko bahaana milaa

maut bar-haq hai ek din lekin
niind raaton ko khuub aati hai

jaan nazr ki to donon jahaan mil gae hamein
tai marg o zindagi kaa har ik marhala huaa

kuchh duur aao maut ke hamraah bhi chalein
mumkin hai raaste mein kahin zindagi mile

mire is avvalin ashk-e-mohabbat par nazar kar
ye moti siip mein phir umr-bhar aataa nahin hai

bol kis moD pe huun kashmakash-e-marg-o-hayaat
aise aalam mein kahaan chhoD diyaa hai mujh ko