main mar gayaa to khaak bhi un ko na gham huaa — Dagh Dehlvi

hazrat-e-'daagh' hai ye kucha-e-qaatil uThiye
jis jagah baiThte hain aap to jam jaate hain

— Dagh Dehlvi

dil hi to hai na aae kyuun dam hi to hai na jaae kyuun
ham ko khudaa jo sabr de tujh saa hasin banaae kyuun

— Dagh Dehlvi

baad muddat ke ye ai 'daagh' samajh mein aayaa
vahi daanaa hai kahaa jis ne na maanaa dil kaa

— Dagh Dehlvi

na ronaa hai tariqe kaa na hansnaa hai saliqe kaa
pareshaani mein koi kaam ji se ho nahin saktaa

— Dagh Dehlvi

sar miraa kaaT ke pachhtaaiyegaa
jhuTi phir kis ki qasam khaaiyegaa

— Dagh Dehlvi

kal tak to aashnaa the magar aaj ghair ho
do din mein ye mizaaj hai aage ki khair ho

— Dagh Dehlvi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi