jo mere paas thaa sab luuT le gayaa koi — Hakeem Manzoor

giregi kal bhi yahi dhuup aur yahi shabnam
is aasmaan se nahin aur kuchh utarne kaa

— Hakeem Manzoor

teri aankhon mein aansu bhi dekhe hain
tere haathon mein dekhaa hai khanjar bhi

— Hakeem Manzoor

reza reza raat bhar jo khauf se hotaa rahaa
din ko saanson par abhi tak bojh us patthar kaa hai

— Hakeem Manzoor

dekhte hain dar-o-divaar harifaana mujhe
itnaa be-bas bhi kahaan hogaa koi ghar mein kabhi

— Hakeem Manzoor

shahr ke aaiin mein ye mad bhi likkhi jaaegi
zinda rahnaa hai to qaatil ki sifaarish chaahiye

— Hakeem Manzoor

ham kisi bahrupiye ko jaan lein mushkil nahin
us ko kyaa pahchaaniye jis kaa koi chehraa na ho

— Hakeem Manzoor

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

— Akbar Allahabadi

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

— Mohammad Alvi

kirshn 'mohan' ye bhi hai kaisaa akelaa-pan ki log
maut se Darte hain main to zindagi se Dar gayaa

— Krishna Mohan

dil hi to hai siyaasat-e-darbaan se Dar gayaa
main aur jaaun dar se tire bin sadaa kiye

— Mirza Ghalib

leader jo nazar aae to bolo ye adab se
taqrir mein tum garmi-e-whiskey se jilaa do

— Asrar Jamayee

na koi dost na hamdam na aashnaa na habib
usi se khauf ziyaada jo hai ziyaada qarib

— Dilawar Figar