main TuTne detaa nahin rangon kaa tasalsul — Hasan Aziz

ik qissa-e-tavil hai afsaana dasht kaa
aakhir kahin to khatm ho viraana dasht kaa

— Hasan Aziz

dekhun vo karti hai ab ke alam-aaraai ki main
haartaa kaun hai is jang mein tanhaai ki main

— Hasan Aziz

bhaTak rahaa huun main is dasht-e-sang mein kab se
abhi talak to dar-e-aaina khulaa na milaa

— Hasan Aziz

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

— Fani Badayuni

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

— Ahmad Faraz

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

— Arshad Jamal Sarim