kyon tasavvur mein ji rahaa huun main — Divyansh Rawat

main baDaa ho gayaa huun magar bachpanaa
mere dil se kabhi bhi gayaa hi nahin

apne hain sab paraayaa koi nahin
par mire dukh mein aayaa koi nahin

us ke munh pe mukar gayaa thaa dil
aaj had se guzar gayaa thaa dil

apni anaa ki aaj bhi taskin ham ne ki
ji bhar ke us ke husn ki tauhin ham ne ki

tumhaaraa baagh se jaanaa bhi ik qayaamat hai
gulon se khushbu gai aur phalon se ras bhi gayaa

safar kaa ek nayaa silsila banaanaa hai
ab aasmaan talak raasta banaanaa hai

mujhe ye zid hai kabhi chaand ko asiir karun
so ab ke jhiil mein ik daaera banaanaa hai

hamein anjaam bhi maalum hai lekin na jaane kyuun
charaaghon ko havaaon se bachaanaa chaahte hain ham

ishq ki raah mein yuun had se guzar mat jaanaa
hon ghaDe kachche to dariyaa mein utar mat jaanaa