main tire dar kaa bhikaari tu mire dar kaa faqir — Iqbal Sajid

apni anaa ki aaj bhi taskin ham ne ki
ji bhar ke us ke husn ki tauhin ham ne ki

— Iqbal Sajid

suraj huun chamakne kaa bhi haq chaahiye mujh ko
main kohr mein lipTaa huun shafaq chaahiye mujh ko

— Iqbal Sajid

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

vo chaand hai to aks bhi paani mein aaegaa
kirdaar khud ubhar ke kahaani mein aaegaa

— Iqbal Sajid

ab tu darvaaze se apne naam ki takhti utaar
lafz nange ho gae shohrat bhi gaali ho gai

— Iqbal Sajid

suraj huun zindagi ki ramaq chhoD jaaungaa
main Duub bhi gayaa to shafaq chhoD jaaungaa

— Iqbal Sajid

aur agar chaahe ki ho 'khvaah-makhvaah' shohrat teri
yusufi gar nahin mumkin to zulekhaai kar

— Ghaus Khah Makhah Hyderabadi

marne ke liye aae the ham dasht-e-balaa mein
jiine ki du'aa de gayaa darvesh hamein kyon

— Aafreen Faheem Aafi

faqir-e-shahr bhi rahaa huun 'shahryaar' bhi magar
jo itminaan faqr mein hai taaj-o-takht mein nahin

— Ahmad Shahryar

ek aalim hai jo sajdon mein gila kartaa hai
ek darvesh hai jo haalaat-e-namnaak mein khush

— Aisha Ayub

kabhi darvesh ke takiya mein bhi aa kar dekho
tang-dasti mein bhi aaraam mayassar niklaa

— Anees Ansari

nigaah chaahiye bas ahl-e-dil faqiron ki
buraa bhi dekhun to mujh ko bhalaa nazar aae

— Anis Dehlavi