main adhuraa saa huun us ke andar — Mirza Athar Zia

ek dariyaa ko dikhaai thi kabhi pyaas apni
phir nahin maangaa kabhi main ne dobaaraa paani

harim-e-dil mein Thahar yaa saraa-e-jaan mein ruk
ye sab makaan hain tere kisi makaan mein ruk

meri aankhon se bhi ik baar nikal
dekhun main teri ravaani paani

mujh mein thoDi si jagah bhi nahin nafrat ke liye
main to har vaqt mohabbat se bharaa rahtaa huun

teri dahliz pe iqraar ki ummid liye
phir khaDe hain tire inkaar ke maare hue log

main hi aaina-e-duniyaa mein chalaa aayaa huun
yaa chali aai hai duniyaa mire aaine mein