yuun na milne ke sau bahaane hain — Qamar Moradabadi

muddaton baad jo is raah se guzraa huun 'qamar'
ahd-e-rafta ko bahut yaad kiyaa hai main ne

harf aane na diyaa ishq ki khuddaari par
kaam naakaam tamannaa se liyaa hai main ne

kisi ki raah mein kaanTe kisi ki raah mein phuul
hamaari raah mein tufaan hai dekhiye kyaa ho

gham ki tauhin na kar gham ki shikaayat kar ke
dil rahe yaa na rahe azmat-e-gham rahne de

jis qadar jazb-e-mohabbat kaa asar hotaa gayaa
ishq khud tark o talab se be-khabar hotaa gayaa

qadam uThe bhi nahin bazm-e-naaz ki jaanib
khayaal abhi se pareshaan hai dekhiye kyaa ho