kuchh aisaa ho ki tasviron mein jal jaae tasavvur bhi — Sardar Saleem

fikr o ehsaas ke tapte hue manzar tak aa
mere lafzon mein utar kar mire andar tak aa

— Sardar Saleem

baadshaahat ke maze hain khaaksaari mein 'salim'
ye nazaara yaar ke kuche mein rah ke dekhnaa

— Sardar Saleem

nuur ki shaakh se TuuTaa huaa pattaa huun main
vaqt ki dhuup mein maadum huaa jaataa huun

— Sardar Saleem

vaqt ke sahraa mein nange paanv Thahre ho 'salim'
dhuup ki shiddat yakaayak baDh na jaae chal paDo

— Sardar Saleem

aaj divaane kaa zauq-e-did puuraa ho gayaa
tujh ko dekhaa aur us ke baa'd andhaa ho gayaa

— Sardar Saleem

'ghaalib'-e-daanaa se puchho ishq mein paD kar salim
ek maaqul aadmi kaise nikammaa ho gayaa

— Sardar Saleem

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

kisi se ishq apnaa kyaa chhupaaein
mohabbat Tapki paDti hai nazar se

— Meer Mehdi Majrooh

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi