fikr o ehsaas ke tapte hue manzar tak aa — Sardar Saleem

kuchh aisaa ho ki tasviron mein jal jaae tasavvur bhi
mohabbat yaad aaegi to shikve yaad aaeinge

baadshaahat ke maze hain khaaksaari mein 'salim'
ye nazaara yaar ke kuche mein rah ke dekhnaa

nuur ki shaakh se TuuTaa huaa pattaa huun main
vaqt ki dhuup mein maadum huaa jaataa huun

vaqt ke sahraa mein nange paanv Thahre ho 'salim'
dhuup ki shiddat yakaayak baDh na jaae chal paDo

aaj divaane kaa zauq-e-did puuraa ho gayaa
tujh ko dekhaa aur us ke baa'd andhaa ho gayaa

'ghaalib'-e-daanaa se puchho ishq mein paD kar salim
ek maaqul aadmi kaise nikammaa ho gayaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

mazhabi bahs main ne ki hi nahin
faaltu aql mujh mein thi hi nahin

yahaan ki auraton ko ilm ki parvaa nahin be-shak
magar ye shauharon se apne be-parvaa nahin hotin

ishq farmaa liyaa to sochtaa huun
kyaa musibat paDi hui thi mujhe

sirf zindon hi ko fikr-e-aish-o-aasaaish nahin
ab to is duniyaa mein murdon ki bhi gunjaaish nahin