abhi farq hai aadmi aadmi mein — Shauq Asar Rampuri

shagufta phuul jo dekhe to 'shauq' yaad aayaa
diye the daagh bhi gulshan ne be-shumaar mujhe

mire khayaal ki vusat mein hain hazaar chaman
kahaan kahaan se nikaalegi ye bahaar mujhe

vo gham ho yaa alam ho dard ho yaa aalam-e-vahshat
use apnaa samajh ai zindagi jo tere kaam aae

bataa nasib-e-nasheman main kyaa duaa maangun
jo aasmaan ki taraf raushni nazar aae

aaj tak dair-o-haram mein tegh hi chalti rahi
laakh ham-rindon ne chaahaa shisha-o-saaghar chalein

maatam-e-marg-e-tamannaa na samajh ai naadaan
zindagi bol rahi hai mire afsaane mein