zarre mein gum hazaar sahraa — Tabish Dehlvi

abhi hain qurb ke kuchh aur marhale baaqi
ki tujh ko paa ke hamein phir tiri tamannaa hai

shaahon ki bandagi mein sar bhi nahin jhukaayaa
tere liye saraapaa aadaab ho gae ham

har raaste se manzil-e-hasti hai bahut duur
jaaegaa mire saath gham-e-yaar kahaan tak

hoti hi nahin subh-e-qayaamat bhi numudaar
jaageinge shab-e-hijr ke bimaar kahaan tak

chhoTi paDti hai anaa ki chaadar
paanv Dhaktaa huun to sar khultaa hai

aaina jab bhi ru-ba-ru aayaa
apnaa chehra chhupaa liyaa ham ne