har raaste se manzil-e-hasti hai bahut duur — Tabish Dehlvi

abhi hain qurb ke kuchh aur marhale baaqi
ki tujh ko paa ke hamein phir tiri tamannaa hai

shaahon ki bandagi mein sar bhi nahin jhukaayaa
tere liye saraapaa aadaab ho gae ham

zarre mein gum hazaar sahraa
qatre mein muhit laakh qulzum

hoti hi nahin subh-e-qayaamat bhi numudaar
jaageinge shab-e-hijr ke bimaar kahaan tak

chhoTi paDti hai anaa ki chaadar
paanv Dhaktaa huun to sar khultaa hai

aaina jab bhi ru-ba-ru aayaa
apnaa chehra chhupaa liyaa ham ne

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

kiyaa dard-o-gham ne mujhe naa-umid
ki majnun ko ye hi thiin bimaariyaan

nur-e-sahar kahaan hai agar shaam-e-gham gai
kab iltifaat thaa ki jo khu-e-sitam gai

hamaare she'r naghme aur sajde
adaa jo ho na paae kyaa hue vo