chhoTi paDti hai anaa ki chaadar — Tabish Dehlvi

abhi hain qurb ke kuchh aur marhale baaqi
ki tujh ko paa ke hamein phir tiri tamannaa hai

shaahon ki bandagi mein sar bhi nahin jhukaayaa
tere liye saraapaa aadaab ho gae ham

har raaste se manzil-e-hasti hai bahut duur
jaaegaa mire saath gham-e-yaar kahaan tak

zarre mein gum hazaar sahraa
qatre mein muhit laakh qulzum

hoti hi nahin subh-e-qayaamat bhi numudaar
jaageinge shab-e-hijr ke bimaar kahaan tak

aaina jab bhi ru-ba-ru aayaa
apnaa chehra chhupaa liyaa ham ne

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kitnaa aasaan thaa tire hijr mein marnaa jaanaan
phir bhi ik umr lagi jaan se jaate jaate

uTh ke us bazm se aa jaanaa kuchh aasaan na thaa
ek divaar se niklaa huun jo dar se niklaa

ai zindagi junun na sahi be-khudi sahi
tu kuchh bhi apni aql se paagal uThaa to laa

tiri yaad mein thi vo be-khudi ki na fikr-e-naama-bari rahi
miri vo nigaarish-e-shauq bhi kahin taaq hi pe dhari rahi