ajnabi khushbu ki aahaT se mahak uTThaa badan — Zaki Tariq

ham bhi kahne lage hain raat ko raat
ham bhi goyaa kharaab hone lage

— Zaki Tariq

'zaki' hamaaraa muqaddar hain dhuup ke kheme
hamein na raas kabhi aayaa saaebaan koi

— Zaki Tariq

gumaan hotaa hai mujh ko tumhaare aane kaa
havaa idhar se dabe paanv jab guzarti hai

— Zaki Tariq

itaab-o-qahr kaa har ik nishaan bolegaa
main chup rahaa to shikasta makaan bolegaa

— Zaki Tariq

roz suntaa huun main hansne ki sadaa
kaun ye mere sivaa hai mujh mein

— Zaki Tariq

simTe hue jazbon ko bikharne nahin detaa
ye aas kaa lamha hamein marne nahin detaa

— Zaki Tariq

jhaankte raat ke garebaan se
ham ne sau aaftaab dekhe hain

— Salman Akhtar

shor din ko nahin sone detaa
shab ko sannaaTaa jagaa detaa hai

— Saifuddin Saif

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat

dil mein na ho jurat to mohabbat nahin milti
khairaat mein itni baDi daulat nahin milti

— Nida Fazli

ab bhi barsaat ki raaton mein badan TuTtaa hai
jaag uThti hain ajab khvaahishein angDaai ki

— Parveen Shakir