itaab-o-qahr kaa har ik nishaan bolegaa — Zaki Tariq

ham bhi kahne lage hain raat ko raat
ham bhi goyaa kharaab hone lage

'zaki' hamaaraa muqaddar hain dhuup ke kheme
hamein na raas kabhi aayaa saaebaan koi

gumaan hotaa hai mujh ko tumhaare aane kaa
havaa idhar se dabe paanv jab guzarti hai

roz suntaa huun main hansne ki sadaa
kaun ye mere sivaa hai mujh mein

simTe hue jazbon ko bikharne nahin detaa
ye aas kaa lamha hamein marne nahin detaa

ajnabi khushbu ki aahaT se mahak uTThaa badan
qahqahon ke lams se khauf-e-khizaan raushan huaa

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

meraa bachpan bhi saath le aayaa
gaanv se jab bhi aa gayaa koi

bahut se lafz dastak de rahe the
sukut-e-shab mein rasta khul rahaa thaa

ab ke ham ne bhi diyaa tark-e-taalluq kaa javaab
honT khaamosh rahe aankh ne baarish nahin ki

sukut tark-e-taalluq kaa ik garaan lamha
banaa gayaa hai sadaaon kaa silsila mujh ko