Shayari Of Anjum Saleemi

Thiik se yaad bhī nahīñ ab to
ishq ne mujh meñ kab qayām kiyā

chakh rahā thā maiñ ik badan kā namak
saare bartan khule paḌe hue the

bas andhere ne rang badlā hai
din nahīñ hai safed raat hai ye

ḳhvāb sharminda-e-visāl huā
hijr meñ niiñd aa ga.ī thī mujhe

ishq farmā liyā to sochtā huuñ
kyā musībat paḌī huī thī mujhe

jab ḳhudā bhī nahīñ thā saath mare
mujh pe biitī hai aisī tanhā.ī

hijr meñ bhī ham ek dūsre ke
aamne sāmne paḌe hue the

itnā be-tāb na ho mujh se bichhaḌne ke liye
tujh ko ā.ankhoñ se nahīñ dil se judā karnā hai

maiñ chīḳhtā rahā kuchh aur bhī hai merā ilaaj
magar ye log tumhārā hī naam lete rahe

ek be-nām udāsī se bharā baiThā huuñ
aaj dil khol ke rone kī zarūrat hai mujhe

maiñ jis charāġh se baiThā thā lau lagā.e hue
pata chalā vo andhere meñ rakh rahā thā mujhe

kisī tarah se nazar mutma.in nahīñ hotī
har ek shai ko dobāra badal ke dekhtā huuñ