Azhar Faragh

aisi ghurbat ko khuda gharat kare
phuul bhejvane ki gunja.ish na ho

ye khamoshi miri khamoshi hai
is ka matlab mukalima liya jaa.e

teri sharton pe hi karna hai agar tujh ko qubul
ye suhulat to mujhe saara jahan deta hai

daftar se mil nahin rahi chhuTTi vagarna main
barish ki ek buund na be-kar jaane duun

jab tak matha chuum ke rukhsat karne vaali zinda thi
darvaze ke bahar tak bhi munh men luqma hota tha

meri numu hai tere taghaful se vabasta
kam barish bhi mujh ko kaafi ho sakti hai

ye nahin dekhte kitni hai riyaazat kis ki
log aasaan samajh lete hain aasaani ko

bahut se saanp the is ghaar ke dahaane par
dil is liye bhi khazaana shumaar hone lagaa

badal ke dekh chuki hai reaayaa saahib-e-takht
jo sar qalam nahin kartaa zabaan khinchtaa hai

bhanvar se ye jo mujhe baadbaan khinchtaa hai
zarur koi havaaon ke kaan khinchtaa hai

dalil us ke dariche ki pesh ki main ne
kisi ko patli gali se nahin nikalne diyaa

aisi ghurbat ko khudaa ghaarat kare
phuul bhejvaane ki gunjaaish na ho