Hasan Naim

sach to ye ki abhi dil ko sukun hai lekin
apne avara khayalat se ji Darta hai

jahan dikha.i na deta tha ek Tiila bhi
vahan se log uTha kar pahaD laa.e hain

payambaron ne kaha tha ki jhuuT harega
magar ye dekhiye apna mushahida kya hai

koi mausam ho yahi soch ke ji lete hain
ik na ik roz shajar gham ka hara to hoga

jo bhi kahna hai kaho saaf shikayat hi sahi
in isharat-o-kinayat se ji Darta hai

jur.at kahan ki apna pata tak bata sakun
jiita huun apne mulk men auron ke naam se

kam nahin ai dil-e-betaab mataa-e-ummid
dast-e-mai-khvaar mein khaali hi sahi jaam to hai

kuchh usulon kaa nasha thaa kuchh muqaddas khvaab the
har zamaane mein shahaadat ke yahi asbaab the

gham se bikhraa na paaemaal huaa
main to gham se hi be-misaal huaa

jo bhi kahnaa hai kaho saaf shikaayat hi sahi
in ishaaraat-o-kinaayaat se ji Dartaa hai

gard-e-shohrat ko bhi daaman se lipaTne na diyaa
koi ehsaan zamaane kaa uThaayaa hi nahin

'iqbaal' ki navaa se musharraf hai go 'naim'
urdu ke sar pe 'mir' ki ghazlon kaa taaj hai