jo bhi kahnaa hai kaho saaf shikaayat hi sahi — Hasan Naim

kam nahin ai dil-e-betaab mataa-e-ummid
dast-e-mai-khvaar mein khaali hi sahi jaam to hai

kuchh usulon kaa nasha thaa kuchh muqaddas khvaab the
har zamaane mein shahaadat ke yahi asbaab the

gham se bikhraa na paaemaal huaa
main to gham se hi be-misaal huaa

gard-e-shohrat ko bhi daaman se lipaTne na diyaa
koi ehsaan zamaane kaa uThaayaa hi nahin

saraa-e-dil mein jagah de to kaaT luun ik raat
nahin hai shart ki mujh ko sharik-e-khvaab banaa

'iqbaal' ki navaa se musharraf hai go 'naim'
urdu ke sar pe 'mir' ki ghazlon kaa taaj hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shaayad miri nigaah mein koi shigaaf thaa
varna udaas raat kaa chehraa to saaf thaa

naa-tamaami ke sharar mein roz o shab jalte rahe
sach to ye hai be-zabaan main bhi nahin tu bhi nahin

ye raat aisi havaaein kahaan se laati hai
ki khvaab phulte hain aur zakhm phalte hain