Shayari Of Munawwar Rana

tumhārī āñkhoñ kī tauhīn hai zarā socho
tumhārā chāhne vaalā sharāb piitā hai

so jaate haiñ fōtpath pe aḳhbār bichhā kar
mazdūr kabhī niiñd kī golī nahīñ khāte

is tarah mere gunāhoñ ko vo dho detī hai
maañ bahut ġhusse meñ hotī hai to ro detī hai

ek aañsū bhī hukūmat ke liye ḳhatra hai
tum ne dekhā nahīñ ā.ankhoñ kā samundar honā

tere dāman meñ sitāre haiñ to hoñge ai falak
mujh ko apnī maañ kī mailī oḌhnī achchhī lagī

ye soch ke maañ baap kī ḳhidmat meñ lagā huuñ
is peḌ kā saayā mire bachchoñ ko milegā

kal apne-āp ko dekhā thā maañ kī āñkhoñ meñ
ye ā.īna hameñ būḌhā nahīñ batātā hai

tumheñ bhī niiñd sī aane lagī hai thak ga.e ham bhī
chalo ham aaj ye qissa adhūrā chhoḌ dete haiñ

ye aisā qarz hai jo maiñ adā kar hī nahīñ saktā
maiñ jab tak ghar na lauTūñ merī maañ sajde meñ rahtī hai

ham nahīñ the to kyā kamī thī yahāñ
ham na hoñge to kyā kamī hogī

farishte aa kar un ke jism par ḳhushbū lagāte haiñ
vo bachche rail ke Dibboñ meñ jo jhāḌū lagāte haiñ

chaltī phirtī huī ā.ankhoñ se azaañ dekhī hai
maiñ ne jannat to nahīñ dekhī hai maañ dekhī hai